ஞாயிறு தகப்பனின் சுதந்தரம்!
17-05-2026
1 இராஜாக்கள் 5:1–9
மலைநாட்டின் மகா பொக்கிஷம்! இஸ்ரவேலின் மாபெரும் தேவாலயத்தைக் கட்ட, உலகத்தின் தலைசிறந்த லீபனோனின் கேதுரு மரங்கள் எருசலேமை நோக்கிக் குவியத் தொடங்குகின்றன. ஆனால், இந்தப் பிரம்மாண்டமான பொக்கிஷத்தை சாலொமோன் தன் வாள் வலிமையால் போர்செய்து கைப்பற்றவில்லை; அது அவனுக்கு இலவசமாக வந்து சேர்கிறது! காரணம் என்ன? தீருவின் மன்னன் ஈராம், சாலொமோனின் தகப்பனான தாவீதின் மேல் வைத்திருந்த மாறாத நேசம்! தகப்பனின் உறவால், எந்தப் பிரயத்தனமுமின்றி மகன் ஆகச்சிறந்த பொக்கிஷங்களைச் சுதந்தரிக்கிறான். போர்க்களத்தைக் காணாதவன், அரியணையில் அமர்ந்தபடியே பெருஞ்செல்வத்தை அறுவடை செய்கிறான். இதுவே புதிய உடன்படிக்கையின் கல்வாரி ரகசியம்! தேவன் தமது ஆகச்சிறந்த ஆசீர்வாதங்களை உன் சொந்தத் தகுதியைப் பார்த்தோ, உன் மாம்சப் போராட்டங்களுக்காகவோ உனக்குத் தருவதில்லை. பிதாவானவர் குமாரனாகிய இயேசுவின் மேல் வைத்திருக்கும் பரிபூரண அன்பின் நிமித்தமாகவே உனக்கு எல்லாவற்றையும் இலவசமாக அருளுகிறார். உன் சுய தகுதியைப் பார்ப்பதை நிறுத்திவிட்டு, கிறிஸ்து இயேசுவின் மூலமாக உனக்குக் கிடைத்த சுதந்தரத்தில் பரிபூரணமாக இளைப்பாறக் கற்றுக்கொள்!
ஜெபம்: அன்பின் பிதாவே, என் சுய முயற்சிகளை உதறிவிட்டு, இயேசுவின் உறவால் எனக்குக் கிடைக்கும் அளவற்ற கிருபைகளைச் சுதந்தரித்துக்கொள்ள எனக்குக் கற்றுத் தாரும். ஆமென்.