புதன்                                  விலைபோகாத சுதந்தரம்!

01-07-2026

1 இராஜாக்கள் 21:1-16

போர்களில் பல வெற்றிகளைக் குவித்த ஆகாப் மன்னன், நாபோத் என்ற சாதாரணக் குடிமகனின் திராட்சைத் தோட்டத்திற்கு ஆசைப்படுகிறான். ஆனால் அது கிடைக்காததால், முகம் வாடி உணவின்றிப் படுக்கையில் முடங்கிக் கிடக்கிறான். தன் அதிகாரத்தின் கீழ் ஏராளமான சொத்துக்கள் இருந்தாலும், அடுத்தவனின் சிறிய நிலத்திற்காக அவன் ஏங்குகிறான். ஆனால் நாபோத்தின் மனநிலையோ முற்றிலும் வேறானது. “இது தேவன் எனக்குத் தந்த என் முன்னோர்களின் சுதந்தரம்” எனக் கூறி, அரசனுடைய பொற்காசுகளை அவன் உறுதியாக மறுக்கிறான். தேவன் கொடுத்த சுதந்தரத்தை உலகமே விலைபேசினாலும் விற்க அவன் தயாராக இல்லை. நாபோத்தின் நிலத்தை அபகரிக்க, ராணி யெசபேல் ‘உபவாசம்’ என்ற போர்வையில் சதி செய்து அவனைக் கொல்கிறாள். அவர்கள் நாபோத்தின் உடலை வீழ்த்தினாலும், தேவன் மீதிருந்த அவனது விசுவாசத்தை அந்த அதிகாரத்தால் அசைக்க முடியவில்லை.

அற்பமான உலக லாபங்களுக்காக, தேவன் உனக்குத் தந்த ஆவிக்குரிய சுதந்தரத்தை ஒருபோதும் விற்றுவிடாதே! 

ஜெபம்: சர்வவல்லவரே, உலகத்தின் கவர்ச்சிகளுக்காக, நீர் எனக்களித்துள்ள ஆவிக்குரிய சுதந்தரத்தை நான் இழந்துவிடாதபடி என்னைக் காத்தருளும். ஆமென்.