திங்கள்                                விருந்தின் நடுவே வந்த கணக்கு
02-11-2026
தானியேல் 5:1–31

பாபிலோனின் அரண்மனையில் விருந்து களைகட்டியது. ஆனால் அன்றிரவு வெளிப்பட்டது மதுவின் தீமை மட்டுமல்ல; அதிகாரத்தின் ஆணவம். பெல்ஷாத்சார் எருசலேம் ஆலயத்தின் பாத்திரங்களைத் தன் களியாட்டத்திற்குப் பயன்படுத்தினான். தேவனுக்கென்று பிரிக்கப்பட்டதைத் தனது பெருமைக்கான பொருளாக்கினான். தானியேலின் குற்றச்சாட்டு தெளிவானது: முன்பு நடந்ததை அறிந்திருந்தும் ராஜா தன்னைத் தாழ்த்தவில்லை. அவன் மறந்தது வரலாறு மட்டுமல்ல; தன் உயிர்மூச்சும் தேவனுடைய கரத்திலிருக்கிறது என்ற உண்மை. சுவரில் தோன்றிய எழுத்து அவனுடைய ஆட்சிக்குக் கணக்கு கேட்டது. பெருமிதம், பாபிலோனின் வீழ்ச்சிக்குக் காரணமானது.
நமக்குக் கொடுக்கப்பட்டுள்ள பணம், பதவி, திறமை, நேரம் அனைத்தும் பொறுப்போடு பயன்படுத்தப்பட வேண்டியவை. நம் வசத்தில் இருப்பதால் எல்லாவற்றையும் சுயநலத்திற்குப் பயன்படுத்த நமக்கு உரிமை கிடையாது. பிறருக்கு நன்மை செய்ய வேண்டிய அதிகாரம், பிறரை இழிவுபடுத்தும் ஆயுதமாக மாறக் கூடாது. இன்று உனக்குக் கொடுக்கப்பட்டுள்ள ஒன்றை நினைத்துப் பார். அதைக் கொண்டு யாருடைய நலனைப் பாதுகாக்க முடியும்? தேவனை மதிக்கும் இதயம், அவர் ஒப்படைத்த அனைத்தையும் மரியாதையோடு கையாளும்.

ஜெபம்: தேவனே, நீர் என்னிடம் ஒப்படைத்தவற்றை அலட்சியமாக நடத்தாமல், பொறுப்புடனும் நன்றியுடனும் பயன்படுத்த எனக்குக் கற்பித்தருளும். உமது மகிமையை என் செயல்கள் வெளிப்படுத்தட்டும். ஆமென்.