திங்கள்                            சுட்டெரிக்கும் சகவாசம்! 

06-07-2026

2 நாளாகமம் 19:1-11

மரணத்தின் விளிம்பிலிருந்து தப்பிய பெருமூச்சுடன் எருசலேம் திரும்புகிறான் அரசன் யோசபாத். நிம்மதியாய் அரண்மனைக்குள் நுழையும்முன், யெகூ என்னும் தீர்க்கதரிசி அங்கே இடிமுழக்கமாய்க் குறுக்கிடுகிறான். இறைவனைப் பகைக்கிற கொடியவர்களுக்கு உதவி செய்து, அவர்களோடு உறவாடலாமா என அவன் எழுப்பிய கேள்வி அரசனைச் சவுக்காய் அறைகிறது!  ஒரு நீதிமானின் ஆகப்பெரிய வீழ்ச்சி ஆயுதங்களால் இல்லை; அவன் தேர்ந்தெடுத்த தகுதியற்ற சகவாசத்திலேயே ஒளிந்திருக்கிறது. ஆகாபோடு அவன் செய்த அந்தச் சமரசம் அவனது ஜீவனையே பலிகேட்டிருக்கும். ஆனால், இங்கேதான் யோசபாத்தின் மேன்மை மிளிர்கிறது. தன் தவற்றை அவன் நியாயப்படுத்தவில்லை; சுருக்கென்ற அந்தச் சத்தியத்தை ஏற்றுக்கொண்டு, தேசத்தைப் பரிசுத்தப்படுத்தும் பணியில் உடனடியாக இறங்குகிறான்.

மனித முகத்தாட்சணியம் முடிவில் உங்களை மரணக்குழியில் தள்ளும். சமூக அந்தஸ்தைக் காக்க, தேவனுக்குப் பிரியமில்லாத உலகத்தோடு நீங்கள் வைக்கும் சமரசம் உங்கள் ஆவிக்குரிய அழிவின் தொடக்கமே! உங்களுக்குக் கேடு விளைவிக்கும் தகாத சகவாசங்களை இன்றே உதறித்தள்ளுங்கள். 

ஜெபம்: சர்வவல்லவரே, மனிதர்களைப் பிரியப்படுத்த நான் செய்துகொள்ளும் சமரசங்களை இன்றே முற்றுமாய் உதறித்தள்ளுகிறேன். எனக்குக் கேடுவிளைவிக்கும் தகாத சகவாசங்களை அறுத்துவிட்டு, உமது சமரசமற்ற பரிசுத்தத்தில் நான் நிமிர்ந்து நிற்கக் கிருபை தாரும். ஆமென்.