செவ்வாய்                    உப்பரிகையில் சரிந்த அதிகாரம்!

07-07-2026

2 இராஜாக்கள் 1:1–18

சமாரியாவின் அரசன் அகசியா பலகணியிலிருந்து தவறி விழுந்து மரண அவஸ்தையில் துடிக்கிறான். தன் ஜீவனைக் காக்க ஜீவனுள்ள தேவனைத் தேடாமல், எக்ரோனின் தேவனாகிய ‘பாகால்செபூப்’ என்னும் ஈக்களின் தெய்வத்திடம் தன் தலையெழுத்தைக் கேட்கத் தூதர்களை அனுப்புகிறான். அவனது இந்தச் செயல், வெறும் கீழ்ப்படியாமையை மட்டும் சுட்டிக்காட்டவில்லை; அவனது விரக்தியின் (despair) இருப்பிடத்தையே தோலுரித்துக் காட்டுகிறது! விக்கிரக ஆராதனை என்பது ஏதோ ஒரு சடங்காச்சார மீறல் அல்ல; அது மனிதன் தன் மாபெரும் கையறுநிலையில், சர்வவல்லவரைத் தவிர்த்துவிட்டு, அற்பமான காரியங்களில் அடைக்கலம் தேடும் அவலநிலையின் வெளிப்பாடு. இஸ்ரவேலில் தேவன் ஒருவரும் இல்லையா என்ற எலியாவின் கேள்வி, அகசியாவின் இருதயத்தின் ஆழமான அவநம்பிக்கையை அளவிடும் மாபெரும் ஆன்மீகப் பரிசோதனை (Diagnosis). மரணத்தின் விளிம்பில் நின்ற அந்த அரசன், ஜீவனைத் தேடுவதற்குப் பதிலாக, அழுகலையும் மரணத்தையும் குறிக்கும் ஈக்களின் தெய்வத்திடம் தன் நம்பிக்கையை அடகுவைத்ததுதான் அவனது மெய்யான வீழ்ச்சி.

உங்கள் வாழ்வில் நோயோ, எதிர்பாராத வீழ்ச்சியோ வந்து உங்களை விரக்தியின் விளிம்பிற்குத் தள்ளும்போது, உங்கள் இதயம் எதைத் தேடி ஓடுகிறது? நெருக்கடியான நேரங்களில் நீங்கள் தேடும் ஆறுதலே, உங்கள் மெய்யான விசுவாசம் எதன்மேல் இருக்கிறது என்பதற்கான அடையாளம். விரக்தியின் பாரம் உங்களை உலகத்தின் அற்பமான பழக்கவழக்கங்கள், மனிதர்களின் செல்வாக்கு, அல்லது போலி ஆறுதல்கள் என்னும் ‘ஈக்களிடம்’ இழுத்துச் செல்ல அனுமதிக்காதீர்கள். உங்கள் விரக்தியை, அதை ஜீவனாக மாற்ற வல்லமையுள்ள சர்வவல்லவரிடமே நேரடியாகக் கொண்டு செல்லுங்கள்!

ஜெபம்: சர்வவல்லவரே, எந்தச் சூழ்நிலையிலும் ஜீவனுள்ள இயேசு கிறிஸ்துவாகிய உம்மண்டை மட்டுமே என் முதல் ஓட்டம் இருக்க உமது ஆவியால் என்னை வழிநடத்துவீராக. ஆமென்.