சனி                                            நீதியின் அம்பு

25-07-2026

2 இராஜாக்கள் 9:14–29

புழுதி பறக்க விரையும் தேர்கள்; அரசர்களின் பட்டுப் பீதாம்பரங்களை ரத்தத்தால் சலவை செய்யக் காத்திருக்கிறது மரணம்! ‘சமாதானமா?’ என்று கேட்டுக்கொண்டு ராஜதந்திரத்துடன் வருகிறான் அரசன். அது முட்டாள்தனம்! வஞ்சகத்தின் அஸ்திவாரத்தில் கட்டப்பட்ட எந்த அரண்மனையிலும் சமாதானம் எப்படித் தங்கும்? ஒரு சாமானியனின் ரத்தம் குடித்த நாபோத்தின் நிலத்திலேயே, சாம்ராஜ்யத்தின் சதுரங்க ஆட்டம் முடிவுக்கு வருகிறது; நெஞ்சில் அம்பை வாங்கி மாய்கிறான் மன்னாதி மன்னன். தன் சொந்த தேசத்திலேயே அடைக்கலம் தர ஒரு பிடிமண் கூட மிஞ்சவில்லை. காலம் தாமதித்தாலும், தேவனுடைய தராசு பிசகாமல் தன் கணக்கைத் தீர்க்கும் பராக்கிரமம் கொண்டது. மனிதன் கட்டியெழுப்பும் போலிச் சமாதானம் ஒரு நொடியில் சுக்குநூறாகிறது.

ஆனாலும், நம் மீதும் பாய்ந்திருக்க வேண்டிய நீதியின் அம்புகளைத் தன் மார்பில் தாங்கி, நித்தியமான மெய்ச் சமாதானத்தை நமக்கு இலவசமாக அருளிய கல்வாரி அன்பின் முத்தமே, நம் ஆத்துமாவின் இறுதிப் புகலிடம்!

ஜெபம்: பிதாவே, என் பாவத்தின் நிமித்தம் என்மீது பாயவேண்டிய மரண அம்புகளை உம்முடைய குமாரன் கல்வாரியில் ஏற்றுக்கொண்டு எனக்கு அளித்த அளவற்ற கிருபைக்காக உம்மைத் துதிக்கிறேன். சிலுவை நாதர் ஈந்த நித்திய சமாதானத்தின் நிழலிலேயே என் வாழ்க்கை முழுமையாக வேரூன்றித் தழைக்கட்டும். ஆமென்.