வியாழன்                                     மகுடம் சூடும் முழக்கம்!

30-07-2026

2 இராஜாக்கள் 11:4–21

தேவாலயத்தின் தூண்களுக்கிடையே உருவிய வாள்களின் அணிவகுப்பு! ஆறு வருடங்களாக எருசலேமின் சிம்மாசனத்தை வஞ்சகமாய் அபகரித்து ரத்த ஆறு ஓடவிட்ட அத்தாலியாளின் செவிகளை, ஒரு எதிர்பாராத பேரோசை அறைகிறது. அது போர்க்களத்தின் முழக்கமல்ல; தேவனுடைய ஆலயத்தில் மெய்யான ராஜாவுக்கு மகுடம் சூட்டப்படும் ஆரவாரம்! ரகசியமாய் வளர்க்கப்பட்ட சிறுவன் யோவாசுக்கு மகுடம் சூட்டப்பட, “ராஜா வாழ்க” என்ற சத்தம் விண்ணைப் பிளக்கிறது. தான் ஆடிய ஆட்டம் முடிவுக்கு வந்ததை உணர்ந்த கொடிய அரசி, “துரோகம்” என்று குமுறியபடியே சிரம் கொய்யப்படுகிறாள். அரியணையைப் பலத்தால் பிடித்தவளின் வீழ்ச்சி, தேவாலயத்தில் மெய்யான ராஜா சிம்மாசனமேறிய அந்த நொடியிலேயே நிர்வாணமாக்கப்படுகிறது. 

இன்று உன் ஆத்துமாவிலும், ஏதோவொரு பழக்கமோ, கவலையோ, பாவமோ உன்னை ஆட்டிப்படைக்கும் அத்தாலியாளைப் போல அதிகாரஞ் செய்கிறதா? சத்துருவின் இந்த ஆளுமைக்குக் காரணம், உன் உள்ளத்தின் அரியணை காலியாய் கிடப்பதே! உன் இருதய தேவாலயத்தில் இயேசு கிறிஸ்துவை மெய்யான ராஜாவாக இன்றே சிம்மாசனத்தில் அமர்த்து; அவர் உனக்குள் மகுடம் சூடும் அந்த நொடியே, உன்னை ஆக்கிரமித்திருக்கும் இருளின் பிடிகள்  உடைந்துபோகும்!

ஜெபம்: சர்வவல்லவரே, நீர் மெய்யான ராஜாவாக எனக்குள் வீற்றிருக்கும் அந்தப் பரிசுத்த ஆளுகையே, சகல சத்துருக்களையும் வேரறுத்து என்னை என்றென்றும் வழிநடத்தட்டும். ஆமென்.