ஞாயிறு                            திறப்பின் வாயிலில்…

21-06-2026

1 இராஜாக்கள் 17:17-24

மூச்சடங்கிய மாடியறை! வானத்தைப் பூட்டிய மாவீரன் எலியா, இன்று சீதோன் தேசத்து மாடியறையில் செத்துக்கிடக்கும் ஒரு சிறுவனின் உடலோடு போராடுகிறான்! அரியணையில் வீற்றிருந்த ஆகாபை எதிர்த்து நியாயத்தீர்ப்பை முழங்குவது அவனுக்கு எளிதாயிருந்தது; ஆனால், மரணத்தின் பிடியிலிருந்து ஒரு ஜீவனை மீட்க, அவன் தன் உடலை அந்தக் குளிர்ந்த சடலத்தின்மேல் மும்முறை கிடத்தி, தேவனிடம் கதற வேண்டியிருந்தது! அதற்கு அவனது ஆழமான தனிப்பட்ட பிரயத்தனம் தேவைப்பட்டது! இந்தச் சடலம் ஒரு தனிப்பட்ட சிறுவனின் சடலம் மட்டுமல்ல; ஆவிக்குரிய ரீதியில் செத்துக்கிடக்கும் இன்றைய சமூகத்தின் அடையாளம். பாவத்தாலும் சாபத்தாலும் மூச்சடங்கிக் கிடக்கும் மனிதர்களைப் பார்த்து நியாயந்தீர்ப்பது மிக எளிது. ஆனால், தீர்க்கதரிசியோ விலகி நிற்கவில்லை; தன் ஜீவனை அந்த மரணத்தின்மேல் கிடத்தித் திறப்பின் வாயிலில் நின்று பரிந்துபேசுகிறான்! நாமும் செத்துக்கிடக்கும் உலகத்தைக் கண்டு குற்றஞ்சாட்டிக் கொண்டிருக்கிறோமா? அல்லது அவர்களுக்காகப் பரிதபித்துத் தேவனிடம் மன்றாடுகிறோமா? ஆவிக்குரிய மரணத்தில் கிடக்கும் சமூகத்திற்காகத் திறப்பின் வாயிலில் நிற்பதே ஒரு தேவ பிள்ளையின் ஆகப்பெரிய பராக்கிரமம்.

ஜெபம்: கர்த்தாவே, ஆவிக்குரிய மரணத்தில் கிடக்கும் மனிதர்களுக்காகத் திறப்பின் வாயிலில் நின்று நான் மன்றாடுகிறேன். அழிந்துபோகும் இந்த ஆத்துமாக்கள் உம்மை அறியவும், உமது வல்லமையால் அவர்கள் மீண்டுமாய் உயிர்ப்பிக்கப்படவும் கிருபை செய்தருளும். ஆமென்.