செவ்வாய்                            மாய்மாலம்!

09-06-2026

1 இராஜாக்கள் 14:1–20

குருடனிடம் கள்ள வேஷம்! பொற்கன்றுகளைக் கடவுளாக வடித்த அரசன், தன் மகன் மரணப்படுக்கையில் தவித்ததும் மெய்யான தேவனையே தேடி ஓடுகிறான். ஆனால் அதிலும் அவனிடம் நேர்மையில்லை! தன் மனைவிக்குக் கள்ள வேஷமிட்டு, வயதுமுதிர்ந்து பார்வை இழந்த அகியாவிடம் அனுப்புகிறான். பார்வையற்ற முதியவரை, ஒரு சாதாரணப் போர்வையால் ஏமாற்றிவிடலாம் என்பது அந்த மூடனின் தப்புக் கணக்கு. ஆனால், அவளது பாதங்கள் வாசற்படியைத் தொடுமுன்னே, “யெரொபெயாமின் மனைவியே, உள்ளே வா! ஏன் இந்த வேஷம்?” என்று இடிமுழக்கமாய்க் கேட்கிறது அந்தப் பார்வையற்றவனின் குரல்! சர்வவல்லவரின் கண்களை எந்த மானிட பகட்டும் ஒருக்காலும் மறைக்க முடியாது. நாமும் பல நேரங்களில் நம் குற்றங்களையும் குறைகளையும் மறைக்க, பகட்டான ஆன்மீக வேஷங்களைப் போட்டுக்கொண்டு தேவ சந்நிதியில் நிற்கிறோம். மனிதக் கண்களை நீ ஏமாற்றலாம்; ஆனால், சிருஷ்டிகரின் ஊடுருவும் பார்வையில் எல்லாத் திரைகளும் கிழிந்தே தீரும். வீணான கள்ள வேஷங்களை இன்றே களைந்துவிட்டு, உன்னை உள்ளபடியே கல்வாரிச் சிலுவையண்டையில் ஒப்புக்கொடு; உனது அத்தனை பலவீனங்களையும் அரவணைத்து மூடிக்கொள்ள இயேசு கிறிஸ்துவின் அளவற்ற கிருபை கரம் விரித்து காத்துக்கொண்டிருக்கிறது!

ஜெபம்: கிருபை நிறைந்தவரே, எந்த வேஷமுமின்றி உள்ளது உள்ளபடியே உம்மண்டை வரும் என்னை, உமது கல்வாரி கிருபையின் கண்ணோட்டத்திலே காண்பதற்காக நன்றி. என் வாழ்நாள் முழுவதும் உமது சந்நிதியில் எவ்வித மாய்மாலமும் இன்றி, நேர்மையாக நடக்க எனக்குக் கிருபை தாரும். ஆமென்.