திங்கள்                            பள்ளத்தாக்கின் தேவன்!

29-06-2026

1 இராஜாக்கள் 20:26-34

அழியும் அகந்தை! “கர்த்தர் மலைகளின் தேவன், பள்ளத்தாக்குகளின் தேவன் அல்ல” என்று முழங்கினான் சீரிய மன்னன் பெனதாத். முந்தைய போரில் மலைப்பகுதியில் தோற்றதால், இப்போது சமபூமியில் இஸ்ரவேலரை எளிதாய் நசுக்கிவிடலாம் என்பது அவனது கணிப்பு. அவனது மாபெரும் படைக்கு முன்னே, இஸ்ரவேலர்கள் “இரண்டு சிறிய வெள்ளாட்டு மந்தைகளைப் போல” (வசனம் 27) காட்சியளிக்கின்றனர்! ஆனால், சர்வவல்லவர் தன் மகிமையைப் பழித்தவனின் நாவை வேரோடு அறுக்கப் புறப்படுகிறார். மனிதக் கணக்கீடுகளின்படி வெற்றிபெற முடியாத அந்தச் சிறு படை, தேவனுடைய வல்லமையால் ஒரே நாளில் ஒரு லட்சம் சீரிய வீரர்களைக் கொன்று குவிக்கிறது! எஞ்சியவர்கள் தப்பியோடி ஒரு மதிலுக்குள் ஒளிய, அந்த மதிலும் இடிந்து விழுந்து இருபத்தேழாயிரம் பேரை மாய்க்கிறது. நேற்றைய மாவீரன் பெனதாத், இன்று தன் இடுப்பில் இரட்டைக்கட்டி, கழுத்தில் கயிற்றை மாட்டிக்கொண்டு ஆகாபிடம் உயிருக்குப் பிச்சை கேட்கிறான். உன் சத்துருக்கள் உன்னைப் பார்த்து, “தேவன் உன்னை மலை உச்சியில்தான் ஆசீர்வதிப்பார்; இந்தப் பள்ளத்தாக்கில் நீ அழிந்துபோவாய்” என்று கேலி செய்யலாம். ஆனால் சற்றும் கலங்காதே; அவர் மலைகளுக்கு மட்டும் தேவனல்ல; நீ தவிக்கும் இருண்ட பள்ளத்தாக்குகளுக்கும் அவரே சர்வவல்லமையுள்ள தேவன்! 

ஜெபம்: சர்வவல்லவரே, என் பலவீனத்தைக் கண்டு என் சத்துரு ஏளனம் செய்யும் போது, நீர் மலைகளுக்கு மட்டுமல்ல, என் இருண்ட பள்ளத்தாக்குகளுக்கும் தேவன் என்பதை விசுவாசிக்கிறேன். உலகத்தின் கணக்கீடுகளைத் தகர்த்து, என் வாழ்வில் உமது வல்லமையை நிரூபித்து எனக்கு ஜெயத்தைத் தந்தருளும். ஆமென்.