ஞாயிறு                              

10-05-2026

பிரியமானவர்களே, 

இயேசு கிறிஸ்துவைத் தவிர்த்து,  மானிடச் சரித்திரம் கண்ட ஈடில்லா ஞானி சாலொமோன்! அவனது அறிவின் வீச்சை இன்றும் உலகம் வியந்து ஆராய்கிறது. இதோ, நமது சரித்திரப் பயணத்தில் ஒரு சிறு இடைவேளை! அடுத்த ஒரு வாரத்திற்கு, காலத்தை வென்ற அந்த மகாராஜாவின்  மூளையிலிருந்து உதித்த மகா ரகசியங்களை அவனது சொந்த எழுத்துக்களிலிருந்தே தோண்டியெடுக்கப் போகிறோம். அதன்பின், நமது சரித்திர ரதம் மீண்டும் தன் பயணத்தைத் தொடங்கும்!

நீதிமொழிகள் 1:1–9 ஞானத்தின் கூக்குரல்!

சாலொமோன் கண்ட ஞானத்தின் முதல் இரகசியம் இது தான்: “ஞானம் வீதியிலே சத்தமிடுகிறது…”  காட்டில் தவம் செய்து தேட வேண்டிய ரகசியமல்ல இது; உன் வாசற்படியில் வந்து மன்றாடும் பரலோகத்தின் இலவசப் பொக்கிஷம்! ஆனால் அந்தோ! அழிவின் விளிம்பில் நிற்கும் மனிதனோ, தன்னைத் தேடிவந்த இந்தத் தெய்வீகப் பொக்கிஷத்தை உதாசீனப்படுத்திவிட்டு, தன் சுயபுத்தியை இறுகக் கட்டிக்கொள்கிறான். ஆபத்தின் சூறாவளி அடிக்கும்போது, தன் சொந்தப் பலத்தால் தப்பிக்க அவன் அலறுவான்; ஆனால் அவனது அந்த அகங்காரக் கூக்குரல் புயலில் வெறுமையாய் எதிரொலிக்கும். புதிய உடன்படிக்கையில், இயேசு கிறிஸ்துவே நமக்கான மெய்யான தேவ ஞானம். புயல் வீசும்போது உன் சுயபுத்தியை நம்பி ஓடாமல், உன்னை நாடிவந்த சிலுவையின் கிருபையை இறுகப் பற்றிக்கொண்டு கிறிஸ்துவில் இளைப்பாறுவதே எல்லாவற்றிலும் பெரிய ஞானம்!

ஜெபம்: சர்வ ஞானியே, என்னை இன்றும் அழைக்கும் உமது கிருபையாகிய கிறிஸ்துவை நான் ஒருபோதும் உதாசீனப்படுத்தாதபடி என் இருதயத்தைக் காத்துக்கொள்ளும். உமது தெய்வீக ஞானத்தின் பரிபூரண நிழலில் நான் என்றும் இளைப்பாறுவேன். ஆமென்.