பெந்தெகொஸ்தே ஞாயிறு

ஞாயிறு                     விண்ணதிர்ந்த பிரசன்னம்!

24-05-2026

2 நாளாகமம் 5:11–14 & 7:1–3

எருசலேம் தேவாலயத்தின் பிரதிஷ்டை! 120 ஆசாரியர்களின் எக்காள முழக்கமும் (வசனம் 12), ஆயிரமாயிரம் நாவுகளின் கீதங்களும் ஒன்றிணைந்து விண்ணைத் தொட்டன. வானம் திறக்கப்பட்டு தேவ மகிமை மாபெரும் மேகமாக ஆலயத்தை நிரப்புகிறது; அந்தப் பிரம்மாண்டமான மகிமையின் பாரம் தாங்காமல் ஆசாரியர்கள் அங்கிருந்து வெளியேறுகிறார்கள் (5:14). அதைத் தொடர்ந்து பரலோகத்திலிருந்து அக்கினி இறங்கி வந்து பலிகளைப் பட்சிக்கிறது!

இச்சம்பவம் முடிந்து சுமார் ஆயிரம் ஆண்டுகளுக்குப் பின்னர், அதே எருசலேமின் ஒரு மேல்வீட்டறையில் 120 சீஷர்கள் கூடியிருந்தார்கள். அன்று ஆலயத்தில் எக்காளங்கள் முழங்கின; இன்று இவர்கள் மேல் அக்கினி நாவுகள் அமர்ந்து பலத்த காற்றின் முழக்கம் உண்டானது! பழைய உடன்படிக்கையில் இறங்கிய தேவ மகிமை, மனிதர்களை ஆலயத்தை விட்டு ‘வெளியே’ துரத்தியது; ஆனால் பெந்தெகொஸ்தே நாளில் இறங்கிய ஆவியானவரோ, மனிதர்களுக்கு ‘உள்ளே’ இறங்கி அவர்களைத் தமது ஜீவனுள்ள ஆலயமாக மாற்றினார். அன்றிலிருந்து இன்று வரை, இந்தப் பரிசுத்த ஆவியானவரின் பிரசன்னமே திருச்சபையின் மாபெரும் வல்லமையாக இருக்கிறது! திரித்துவத்தின் வல்லமையான இந்தப் பரிசுத்த ஆவியானவரை நீ மெய்யாகவே அறிந்திருக்கிறாயா? உன் ஆத்துமாவை உயிர்ப்பிக்கும் அவருடைய அபிஷேக அக்கினியை நீ சுதந்தரித்திருக்கிறாயா? இல்லையெனில், இன்றே அந்த ஈடில்லா வல்லமையைப் பிதாவிடம் கேட்டுப் பெற்றுக்கொள்; உன்னை நிரப்பும் ஆவியானவரின் பிரசன்னம் உன் சாதாரண வாழ்வை ஒரு காவியமாக உருமாற்றும்!

ஜெபம்: ஆவியானவரே, உமது வல்லமையால் என்னை அபிஷேகித்து, உமது பிரசன்னத்தினால் நிரப்பியருளும். உமது மகிமையின் மேகமே, என்னை வாழ்நாள் முழுவதும் வழிநடத்தட்டும். ஆமென்.