சனி                                    மண்டியிடும் மகா ஞானம்! 

16-05-2026

நீதிமொழிகள் 9:1–18

அடிபணியும் அரியணை! சாலொமோன் கண்ட ஞானத்தின் ஏழாவது மற்றும் தலையாய இரகசியம் இதுதான்: “கர்த்தருக்குப் பயப்படுதலே ஞானத்தின் ஆரம்பம்” (வசனம் 10). மனிதன் பிரபஞ்சத்தின் ரகசியங்களை ஆராயத் தொலைநோக்கிகளை உருவாக்குகிறான்; ஆயிரக்கணக்கான புத்தகங்களை விழுங்கிப் பட்டங்களைச் சூடிக்கொள்கிறான். ஆனால், அண்டசராசரங்களைப் படைத்த சர்வவல்லவரின் முன் ஒரு சிறுபிள்ளையாய் மண்டியிடாமல், மனிதனால் மெய்யான ஞானத்தின் அரிச்சுவடியைக் கூடத் தொடமுடியாது. கர்த்தருக்குப் பயப்படுதல் என்பது தண்டனைக்கு அஞ்சி நடுங்கும் அடிமைத்தனமல்ல; அது கல்வாரி அன்பின் பிரம்மாண்டத்தைக் கண்டு மெய்சிலிர்த்து நிற்கும் பரிசுத்த நிலையைக் குறிக்கிறது! தேவனுடைய அளவற்ற கிருபையின் முன்னே நீ மண்டியிடும் அந்த நொடியில்தான் பரலோகத்தின் திறவுகோல் உன் வசமாகிறது!

ஜெபம்: தேவனே, உலக அறிவைக் கண்டு கர்வம் கொள்ளாமல், உமது கல்வாரி அன்பின் பிரம்மாண்டத்தைக் கண்டு, உமது கிருபையின் பாதத்தில் மண்டியிட்டு நித்திய ஞானத்தை நான் சுதந்தரிக்கச் செய்தருளும். ஆமென்.