புதன் மறைக்கப்பட்ட கற்பாறைகள்!
20-05-2026
1 இராஜாக்கள் 6:15-38
பொன்னால் மூடிய பாறைகள்! எருசலேம் தேவாலயத்தின் பிரம்மாண்டம் அதன் அளவுகளில் இல்லை; அதன் அந்தரங்கத்தில்தான் ஒளிந்திருக்கிறது! வெளியிலிருந்து பார்த்தால் அது கரடுமுரடான கற்பாறைகளால் எழுப்பப்பட்ட மாளிகை. ஆனால், மகா பரிசுத்த ஸ்தலத்திற்குள் நுழைந்து பார்; அங்கே ஒரு கல்லைக் கூட உன் கண்கள் காணமுடியாது! (வசனம் 18) என்று சரித்திரம் வியக்கிறது. கடினமான பாறைகள் அனைத்தும் சுத்தப் பொன்னாலும், வாசனையுள்ள கேதுரு மரத்தாலும் முற்றிலுமாய் மூடப்பட்டுவிட்டன. மரணத்தைச் சுட்டிக்காட்டும் நியாயப்பிரமாணத்தின் ‘கல்’, புதிய உடன்படிக்கையின் கிருபையாகிய ‘தங்கத்தால்’ முற்றுமாய் விழுங்கப்பட்டுவிட்டது. உன் மாம்சத்தின் பலவீனங்களையும், கல்லைப் போன்ற கடினமான உன் கடந்த காலத்தையும் சுட்டிக்காட்டிச் சத்துரு உன்மேல் பழிசுமத்தலாம். ஆனால், தேவன் உன்னைப் பார்க்கும்போது அந்தப் பாறைகளைக் காண்பதில்லை; உன்னை முற்றுமாய் மூடியிருக்கும் இயேசுவின் சுத்தப் பொன்னான நீதியையே காண்கிறார்! உன் மாம்சத்தின் குறைகளைப் பார்த்து சுயபரிதாபத்தில் மூழ்குவதை நிறுத்திவிட்டு, தேவன் உன்னைக் காணும் கண்ணோட்டத்தின் வெளிப்பாட்டினை நீ பெற்றுக் கொள்வாயாக.
ஜெபம்: அன்பின் பிதாவே, சத்துருவின் குற்றச்சாட்டுகளுக்குச் செவிகொடாமல், என்னை அலங்கரிக்கும் கல்வாரியின் கிருபையில் நான் என்றென்றும் நிமிர்ந்து நிற்க எனக்குப் பெலன் தாரும். ஆமென்.