2 சாமுவேல் 5:1–5

“மேய்ப்பன் மன்னனானான்” 

எல்லா கோத்திரங்களும் எப்ரோனுக்குத் திரண்டு வந்தன. இது யுத்த அழைப்பு அல்ல; உறவின் சங்கமம். “நாங்கள் உம்முடைய எலும்பும் மாம்சமுமாய் இருக்கிறோம்” என்ற குரலில் எத்தனை வாஞ்சை!  நேற்று வரை இஸ்ரவேல் பிளவுபட்டுக் கிடந்தது. அப்னேர் அரசியல் பேசினான்; யோவாபு கத்தியைத் தீட்டினான். ஆனால் அவர்களால் தேசத்தை இணைக்க முடியவில்லை. இன்று தாவீதிடம் மக்கள் வந்த காரணம் என்ன? அவனது போர்வாள் அல்ல; அவனது மேய்ப்பன் கோல். பார்த்தீர்களா? அதிகாரம் என்பது மக்களை அடக்கி ஆள்வதல்ல; மந்தையை மேய்ப்பது போல அரவணைப்பது. ஆடுகளை நேசிக்கும் ஒருவனால்தான், தேசத்தையும் நேசிக்க முடியும். சிதறிப்போன உள்ளங்களைச் சேர்க்க, அரசியல் தந்திரங்கள் உதவாது; அன்பு நிறைந்த மேய்ப்பனின் இதயமே தேவை.

ஜெபம்:

நல்ல மேய்ப்பரே, நான் எனக்குக் கொடுக்கப்பட்ட பொறுப்புகளை அதிகாரத் தோரணையில் அல்ல, அன்பின் அடிப்படையில் நிறைவேற்ற உதவும். பிரிந்து போனவர்களைச் சேர்க்கும் அன்பின் கருவியாக என்னைப் பயன்படுத்தும். ஆமென்.