சனி                தளர்ந்தன வீரக் கரங்கள்!

25-04-2026

2 சாமுவேல் 21:15–22

மழுங்கியது போர்வாள்! ஒருகாலத்தில் கவணால் கோலியாத்தைச் சரித்த இஸ்ரவேலின் மாவீரன், இன்று போர்க்களத்தில் தளர்ந்து நிற்கிறான். வயதின் சுமையால் தாவீது விடாய்த்துப் போனான்! சிரம் கொய்த சிங்கமே இன்று ஒரு அரக்கனிடம் சிக்கிக்கொள்ளும் தருணம்! இஸ்பிபெனோப் என்ற புதியதோர் அரக்கன், கூர்மையான பட்டயத்துடன் ராஜாவைக் கொல்லப் பாய்கிறான். அடுத்த நொடி, அபிசாய் மின்னலெனப் பாய்ந்து அந்த அரக்கனை மாய்த்து ராஜாவைக் காக்கிறான். அன்று கூரையைப் பிரித்துத் தன் நண்பனைச் சுமந்து வந்த நால்வரைப் (லூக் 5:17-26) போல, இன்று அபிசாயும் வீரர்களும் தளர்ந்த ராஜாவைத் தாங்கிப் பிடித்தனர். மாவீரனுக்கும் ஒருநாள் சோர்வு வரும்; அப்போது உங்களைத் தாங்கிப்பிடிக்கும் திருச்சபையின் ஐக்கியமே உன்னத அரண்! உங்களால் நடக்க முடியாதபோது, உங்கள் பாரத்தைச் சுமந்து கிறிஸ்துவின் சமூகத்தில் சேர்க்கும் விசுவாசத் தோழர்கள் நமக்கு அவசியம்.

ஜெபம்: சர்வவல்லவரே, என் பலவீனங்களில் என்னைத் தாங்கிப்பிடிக்கும் நட்புறவுகளை எனக்குத் தாரும். தனித்துப் போராடாமல், உமது திருச்சபையின் ஐக்கியத்தில் நான் பெலப்படக் கிருபை செய்யும். ஆமென்.